Geart Tigchelaar: Leech hert yn nij jek Yn leech hert yn nij jek, syn earste dichtbondel, rekkenet Geart Tigchelaar (1987) ôf mei it ferline, mar sjocht ek foarút. In besykjen dat de iene kear better slagget as de oare kear. Dat leveret poëzy op dy’t skjirret, dy’t echt is, dy’t libbet en stjert as in hert. wy slachten mekoar snijden bonken út raanden it smoar yn ’e maaitiidssinne waarden wei troch de iepen hikke (út: ‘slachtfee’) Geart Tigchelaar (1987) debutearre yn 2010 mei de kaairoman De kweeste fan ridder Piter (skreaun tegearre mei Dirk Jan Muntendam). In jier letter ferskynde syn humoristyske ferhalebondel oer in luzehúshâlding, Lúshâlding en yn 2015 kaam syn oersetting fan Erik of it lyts ynsekteboek fan Godfried Bomans út. Geart Tigchelaar is redakteur fan it literêr tydskrift Ensafh, dêr’t er gedichten, proaza en resinsjes yn publisearret, sawol yn de papieren edysje as op ’e webside (ensafh.nl). Dêrnêst publisearret er ek yn it ynternettydskrift Y-skrift (skanomodu.nl)